မြန်မာနိုင်ငံအမျိုးသားလူ့အခွင့်အရေးကော်မရှင် ဆောင်ရွက်ချက်အမှတ်စဉ်( ၉ /ကာကွယ်/၂၀၁၉)

၁။      မြန်မာနိုင်ငံ အမျိုးသား လူ့အခွင့်အရေးကော်မရှင်မှ အဖွဲ့ဝင်များဖြစ်ကြသော ဦးယုလွင်အောင် နှင့် ဒေါက်တာမြင့်ကြည်တို့ ဦးဆောင်သည့် ကြည့်ရှုစစ်ဆေးရေးအဖွဲ့သည် ၁၃-၅-၂၀၁၉ ရက်နေ့မှ  ၁၇-၅-၂၀၁၉ ရက်နေ့ထိ အကျဉ်းဦးစီးဌာနအောက်ရှိ မန္တလေးဗဟိုအကျဉ်းထောင်၊ ဘဲလင်း(၁)၊ (၂)၊ ထုံးဘို(ကျား)(၁)၊ (၂)၊ ထုံးဘို(မ)နှင့် ၂၄ မိုင်ကုန်ထုတ်စခန်းတို့အား ကော်မရှင်ဥပဒေ ပြဋ္ဌာန်းချက် များနှင့်အညီ ကြည့်ရှုစစ်ဆေးခဲ့ပြီး သက်ဆိုင်ရာ ဝန်ကြီးဌာနသို့ ပေးပို့ခဲ့ပါသည်။

၂။       ဘဲလင်း(၁)ကုန်ထုတ်စခန်းနှင့် ပတ်သက်သည့် အကြံပြုချက်များမှာ-

(က)    အစာအိမ်ရောင် မကြာခဏ ဗိုက်အောင့်ရောဂါဖြစ်နေပြီး အူကျရောဂါပါ ဖြစ်နေသူ အကျဉ်းသားတစ်ဦးအား ဆေးဝါးကုသနိုင်ရေး ဆောင်ရွက်ပေးသင့်ပါသည်။

(ခ)     ကော်မရှင် ကြည့်ရှုစစ်ဆေးရေးအဖွဲ့ ၁၁-၇-၂၀၁၈ ရက်နေ့ ကြည့်ရှုစစ်ဆေးစဉ်ကထက် အကျဉ်းသားများ စားသောက်နေထိုင်ရေး အခြေအနေများမှာ ပိုမိုတိုးတက်လာကြောင်း တွေ့ရှိရသဖြင့် ယခုအခြေအနေကို ဆက်လက်ထိန်းသိမ်းထားသင့်ပါသည်။

၃။      ဘဲလင်း (၂) ကုန်ထုတ်စခန်းနှင့် ပတ်သက်သည့် အကြံပြုချက်များမှာ-

(က)    မီးဖိုကြီး တာဝန်ကျ အကျဉ်းသား လုပ်အားရှင်များမှာ အကျဉ်းသား အချင်းချင်း အပေါ် တွင် ဘက်လိုက်မှုရှိကြောင်း သတင်းပို့ တင်ပြကြသဖြင့် လိုအပ်သလိုစိစစ်ပြီး သင့်လျော် သူ အကျဉ်းသားများကို လဲလှယ်တာဝန်ပေးအပ်သင့်ပါသည်။

(ခ)     စခန်းတာဝန်ကျ ဆေးမှူးသည် ကျန်းမာရေး စောင့်ရှောက်မှုအားနည်းကြောင်းနှင့် အမှန်တကယ် နေမကောင်းသူများကို အနားမပေးကြောင်း တင်ပြကြသဖြင့် တာဝန်ခံ အရာရှိမှ ကြပ်မတ်သင့်ပါသည်။

(ဂ)     အရေပြားရောဂါဖြစ်နေသော အကျဉ်းသားတစ်ဦးအား ဆေးရုံရှိရာ အကျဉ်းထောင် တစ်ခုခုသို့ ပြန်လည် ပို့ဆောင်ပေးသင့်ပါသည်။

(ဃ)    နေ့စဉ် သုံးစွဲရေမှာ လောက်ငှမှုမရှိကြောင်း သတင်းပို့တင်ပြကြသဖြင့် အဆင်ပြေမှု ရှိစေရေး ဆောင်ရွက်ပေးသင့်ပါသည်။

(င)     TB ရောဂါပိုးရှိသည်ဟု သံသယရှိပြီး ဆေးစစ်ထားသည့် အကျဉ်းသားတစ်ဦးအား ဆေးကုသနိုင်ရေး သင့်လျော်ရာ အကျဉ်းထောင်သို့ ပြန်လည်ပို့ဆောင် ကုသပေးသင့် ပါသည်။

(စ)     လုပ်ငန်းခွင်တွင် အကျဉ်းသားများ နားနေရန် နေရာမရှိကြောင်း သတင်းပို့ တင်ပြကြ သဖြင့် ယာယီအဆောက်အဦ ဆောက်လုပ်ပေးသင့်ပါသည်။

၄။      မန္တလေးဗဟိုအကျဉ်းထောင်နှင့် ပတ်သက်သည့် အကြံပြုချက်များမှာ-

(က)    ခြေလက်များမှာ အနာကြီးရောဂါ ဖြစ်နေသည့်အသွင် ဖြစ်နေသည့် အကျဉ်းသားကို လိုအပ်သလို စစ်ဆေးကုသပေးသင့်ပါသည်။

(ခ)     ခါးနာရောဂါ ဖြစ်ပွားနေသည့် အကျဉ်းသားတစ်ဦးကို လိုအပ်သော စစ်ဆေးကုသမှု ပေးသင့်ပါသည်။

(ဂ)     ဘယ်ဘက်မျက်စိ တိမ်စွဲနေပြီး ကောင်းမွန်စွာ မမြင်ရသည့် အကျဉ်းသားတစ်ဦးကို မျက်စိဆရာဝန်နှင့် ပြသကုသပေးသင့်ပါသည်။

(ဃ)    အစာအိမ်ရောဂါ ဖြစ်နေသည့် အကျဉ်းသားတစ်ဦးမှာ ထောင်တွင်းဆေးရုံပြသရာ မသက်သာကြောင်း သတင်းပို့တင်ပြသဖြင့် ပြင်ပ ဆေးရုံသို့ ပြသပေးသင့်ပါသည်။

(င)     အကျဉ်းသူတစ်ဦးမှာ ထုံးဘိုကုန်ထုတ်စခန်းတွင် ရှိစဉ်က ဘယ်ဘက်မျက်လုံးမှာ ကျောက်စမှန်ပြီး ပြည်များ ထွက်နေသဖြင့် မျက်စိဆရာဝန်နှင့် ပြသ၍ လိုအပ်သော ခွဲစိတ်ကုသမှု ဆောင်ရွက်ပေးသင့်ပါသည်။

(စ)     အကျဉ်းထောင်ဆေးရုံတွင် အသဲရောင်(စီပိုး) ရောဂါရှိသူများအတွက် ဆေးဝါးများကို အကျဉ်းထောင်အစီအစဉ်ဖြင့်ဖြစ်စေ၊ ကျန်းမာရေးဦးစီးဌာနနှင့် ဆက်သွယ်၍ ဖြစ်စေ ဖြည့်ဆည်းပေးသင့်ပါသည်။

(ဆ)    အကျဉ်းသားတစ်ဦးမှာဘယ်ဘက်ပေါင်တွင်စတီးရိုးထည့်ထားရာကွေး/ဆန့်မရသဖြင့် စတီးရိုးပြန်ထုတ်လိုကြောင်း သတင်းပို့ တင်ပြသဖြင့် လိုအပ်သလို စစ်ဆေးကုသပေး သင့်ပါသည်။

၅။      ထုံးဘို (ကျား) (၁) ကုန်ထုတ်စခန်းနှင့် ပတ်သက်သည့် အကြံပြုချက်များမှာ-

(က)    အလုပ်ချိန်၊ နားချိန်များကို သတ်မှတ်ထားသည့် စည်းကမ်းများနှင့်အညီ တိကျမှု ရှိစေ ရေး တာဝန်ခံအရာရှိမှ ကြပ်မတ်သင့်ပါသည်။

(ခ)     အချို့တာဝန်ကျ အကျဉ်းသားများမှ စခန်းအတွင်း ဝန်ထမ်းများ လစ်လျှင် အကျဉ်းသား အချင်းချင်းအပေါ် အမြတ်ထုတ်မှုများရှိကြောင်း သတင်းပို့ တင်ပြကြသဖြင့် တာဝန်ခံ အရာရှိမှ ကြပ်မတ်သင့်ပါသည်။

၆။      ထုံးဘို(ကျား)(၂)ကုန်ထုတ်စခန်းနှင့် ပတ်သက်သည့် အကြံပြုချက်များမှာ-

(က)    အကျဉ်းသားများကို လုပ်ငန်းခွင် တာဝန်ပေးရာ၌ အသက်အရွယ်အလိုက် မျှတစွာ တာဝန်ခွဲဝေ ချထားနိုင်ရေး တာဝန်ခံအရာရှိမှ ဆောင်ရွက်သင့်ပါသည်။

(ခ)     ကျန်းမာရေးမှူးမှ ဆေးဝါးများနှင့်အတူ လုပ်ငန်းခွင်တွင် အရေးပေါ် ကျန်းမာရေး စောင့်ရှောက်မှု ပေးနိုင်ရေး ဆောင်ရွက်ထားသင့်ပါသည်။

၇။      ထုံးဘို(မ)ကုန်ထုတ်စခန်းနှင့် ပတ်သက်သည့် အကြံပြုချက်များမှာ-

(က)    စခန်းစစ်ဆေးစဉ် အသက် ၆၀ နှစ်အထက် အကျဉ်းသူ ၂ ဦးရှိကြောင်း သိရှိရသဖြင့် အသက်အရွယ်အရ လုပ်ကိုင်နိုင်သော တာဝန်ကိုသာ ပေးအပ်ခြင်း သို့မဟုတ် အကျဉ်း ထောင်သို့ ပြန်ပို့ခြင်းကို ဆောင်ရွက်သင့်ပါသည်။

(ခ)     စခန်းဆေးခန်းတွင် ဆေးဝါးစုံလင်မှုနည်းသော်လည်း ၂၀၁၉ ခုနှစ်အတွင်း ပြင်ပမှ ဆေးဝါး နှစ်ကြိမ်သာ ဝယ်ယူကြောင်း သိရှိရသဖြင့် အထက်ဌာနသို့ တင်ပြ၍ လစဉ် ဝယ်ယူနိုင်ရေး ဆောင်ရွက်သင့်ပါသည်။

(ဂ)     အကျဉ်းသူအချို့တွင် ယားနာ၊ ဝဲ၊ ကျောက်ပွေးများ ပေါက်နေသူများ ရှိသဖြင့် ဆေးဝါး များ ဖြည့်ဆည်း၍ စနစ်တကျ ကုသမှုပေးသင့်ပါသည်။

(ဃ)    အကျဉ်းသူများကို အမျိုးသမီးရောဂါများ ပုံမှန်စစ်ဆေးကုသနိုင်ရေး မီးယပ်ရောဂါကု ဆရာဝန်ကြီးများ ပင့်ဖိတ်၍ ကုသမှု ပေးနိုင်ရေး ဆောင်ရွက်သင့်ပါသည်။

၈။      ၂၄ မိုင်ကုန်ထုတ်စခန်းနှင့် ပတ်သက်သည့် အကြံပြုချက်များမှာ-

(က)    အစာအိမ်ရောဂါဖြင့် ဆေးခန်းလိုက်သူ အကျဉ်းသားမှာ ၂၀၁၉ ခုနှစ်အတွင်း တစ်လ လျှင် ၅၅ ဦးရှိသဖြင့် လိုအပ်သော ဆေးဝါးနှင့် ကုသမှု ပိုမို ဆောင်ရွက်ပေးသင့်ပါသည်။

(ခ)     မိသားစုနှင့် အဆက်အသွယ် မရရှိသေးသည့် အကျဉ်းသားများကို ဆက်သွယ်မှု ရရှိရေး ဆောင်ရွက်ပေးသင့်ပါသည်။

(ဂ)     စခန်းတွင် ရေသန့်စက် တပ်ဆင်နိုင်ရေး ဆောင်ရွက်နေကြောင်း သိရှိရသဖြင့် အမြန် တပ်ဆင်နိုင်ရေး ဆောင်ရွက်သင့်ပါသည်။

၉။      ကုန်ထုတ်စခန်းများတွင် လွတ်ငြိမ်းသက်သာခွင့်ရသူများ လွတ်မြောက်သွားသဖြင့် ကျန်ရှိ သည့် အကျဉ်းသားများအနေဖြင့် ကျောက်ထုတ်ရသည့်လုပ်ငန်းအပြင် ဗာဟီရအလုပ်များကိုပါ ပိုလုပ်နေရသကဲ့သို့ ဖြစ်နေကြောင်း သတင်းပို့မှုများရှိ၍ အလုပ်လုပ်ရမည့်ပမာဏကို အလုပ်လုပ်မည့် သူအရေအတွက်နှင့် ချိန်ဆ၍ စီမံဆောင်ရွက်စေသင့်ပါသည်။

မြန်မာနိုင်ငံ အမျိုးသား လူ့အခွင့်အရေး ကော်မရှင်

ရက်စွဲ၊ ၂၀၁၉ ခုနှစ်၊ ဇွန်လ ၇ ရက်