မြန်မာနိုင်ငံအမျိုးသားလူ့အခွင့်အရေးကော်မရှင် ဆောင်ရွက်ချက် အမှတ်စဉ်(၂၉/ကာကွယ်/၂၀၁၈)

၁။      မြန်မာနိုင်ငံ အမျိုးသား လူ့အခွင့်အရေး ကော်မရှင်မှ အဖွဲ့ဝင် ဦးယုလွင်အောင်နှင့် ဒေါက်တာ ဒေါ်တင်မေထွန်းတို့ပါဝင်သည့် ကြည့်ရှုစစ်ဆေးရေးအဖွဲ့သည် ၂၀၁၈ ခုနှစ်၊ ဩဂုတ်လ ၂၃ ရက်နေ့ တွင် ဒိုက်ဦးအကျဉ်းထောင်၊ ကျိုက်စကောစိုက်ပျိုးမွေးမြူရေးနှင့် အသက်မွေးမှုအတတ်သင်စခန်း အား ကော်မရှင်ဥပဒေနှင့်အညီ ကြည့်ရှု စစ်ဆေးခဲ့ပြီး အောက်ပါအကြံပြုချက်များကို သက်ဆိုင်ရာ ဝန်ကြီးဌာနသို့ ပေးပို့ခဲ့ပါသည်။

၂။      ဒိုက်ဦးအကျဉ်းထောင်နှင့် ပတ်သက်သည့် အကြံပြုချက်များ-

(က)    အိပ်ဆောင် ၁ တွင် လျှပ်စစ်မီးကြိုးများ သွယ်တန်းရာတွင် ရှုပ်ထွေးနေသဖြင့် ပြုပြင် သင့်ပါသည်။

( ခ )   အိပ်ဆောင်တိုင်းတွင် ညမိလ္လာများ သန့်ရှင်းမှု အားနည်းကြောင်း တွေ့ရှိရသဖြင့် သန့်ရှင်းရေး ဆောင်ရွက်စေသင့်ပါသည်။

( ဂ )   ART ​ဆေး မရရှိသေးသူ HIV ​ရောဂါသည် ၈ ဦးအား အမြန်ရရှိရေး ဆောင်ရွက် ပေးသင့်ပါသည်။

(ဃ)    အိပ်ဆောင်များရှိ ရေသန့်ဘူးများ သန့်ရှင်းမှုမရှိသဖြင့် သန့်ရှင်းရေး ဆောင်ရွက်စေ သင့်ပါသည်။

( င )   ခြေထောက်မှ ခွဲစိတ်ဒဏ်ရာအား ထပ်မံ ခွဲစိတ်ရန်လိုအပ်သည့် အကျဉ်းသားတစ်ဦးကို အကျဉ်းထောင်ဆေးရုံသို့ ကုသနိုင်ရေး ပြောင်းရွှေ့ပေးသင့်ပါသည်။

( စ )   အကျဉ်းသား အများစုမှ ကျန်းမာရေး စောင့်ရှောက်မှု အားနည်းသည်ဟု သတင်းပို့ တင်ပြကြသဖြင့် တာဝန်ရှိသူများမှ ကြပ်မတ်သင့်ပါသည်။

(ဆ)    အကျဉ်းထောင်တွင် သတင်းစာ၊ ဂျာနယ်များကို လွတ်လပ်စွာ ဖတ်ရှုခွင့် မရှိကြောင်း အကျဉ်းသားအချို့မှ တင်ပြသဖြင့် နေ့စဉ်ထုတ်သတင်းစာများ လွတ်လပ်စွာဖတ်ရှုခွင့် ပြုပေးသင့်ပါသည်။

( ဇ )   မျက်လုံးရောဂါဖြစ်နေသော အကျဉ်းသားတစ်ဦးကို ကုသနိုင်ရေး ဆောင်ရွက်ပေးသင့် ပါသည်။

( ဈ )   အူကျရောဂါ၊ သွေးတိုးရောဂါ၊ လိပ်ခေါင်းရောဂါဖြစ်နေသည့် အကျဉ်းသား တစ်ဦးမှ သက်သာမှု မရှိကြောင်း သတင်းပို့တင်ပြသဖြင့် လိုအပ်သလို စစ်ဆေး၍ ဆေးရုံ တက် ရောက်ကုသနိုင်ရေး ဆောင်ရွက်ပေးသင့်ပါသည်။

(ည)    ညာဒူးစတီးရိုးထည့်ထားသည့် အကျဉ်းသားတစ်ဦးမှ ဆေးရုံနှင့်နီးသည့် ပဲခူးအချုပ် ထောင်သို့ ပြောင်းရွှေ့လိုကြောင်း သတင်းပို့တင်ပြသဖြင့် လိုအပ်သလို ဆောင်ရွက် သင့်ပါသည်။

(ဋ)     နေ့လည် ၁၂ နာရီမှ ၂ နာရီထိ တန်းပိတ်ချိန်များတွင် လျှပ်စစ်မီးပိတ်ထားသဖြင့် တီဗွီကြည့်ရန် အခက်အခဲရှိကြောင်း သတင်းပို့တင်ပြသဖြင့် လိုအပ်သလိုဆောင်ရွက် သင့်ပါသည်။

(ဌ)     ဧည့်တွေ့ဆောင်သည် သံဇကာ ၄ ထပ် ကာထားသဖြင့် ဧည့်သည်နှင့် အကျဉ်းသား မျက်နှာ မမြင်တွေ့ရခြင်းကြောင့် လိုအပ်သလို ပြင်ဆင်သင့်ပါသည်။

၃။      ကျိုက်စကောစိုက်/မွေးစခန်းနှင့် ပတ်သက်သည့် အကြံပြုချက်များ-

(က)    ရပ်ဝေးမှ အကျဉ်းသားမိသားစုများ ညအိပ်လာရောက် တွေ့ဆုံသူများအတွက် နားနေ ရန် နေရာ စီစဉ်ပေးသင့်ပါသည်။

( ခ )   အကျဉ်းသားများကို နေ့စဉ် အားကစား ပြုလုပ်ခွင့် ပေးသင့်ပါသည်။

( ဂ )   HIV ပိုးတွေ့ရှိသည့် အကျဉ်းသား တစ်ဦးကို မိသားစုနှင့်နီးရာ အင်းစိန်ဗဟို အကျဉ်း ထောင်သို့ ပြန်လည် ပို့ဆောင်ရေး ဆောင်ရွက်သင့်ပါသည်။

(ဃ)    TB ​ရောဂါဖြစ်နေကြောင်း သံသယရှိသည့် အကျဉ်းသားတစ်ဦးသည် ဓာတ်မှန် ရိုက်ရာတွင် အဆုတ်တွင် အနာများ ပေါ်နေကြောင်း သတင်းပို့သဖြင့် လိုအပ်သလို ကုသပေးသင့်ပါသည်။

( င )   ပြင်ပတွင် ယာဉ်မတော်တဆမှုဖြင့် ဒဏ်ရာရရှိခဲ့သည့် အကျဉ်းသားတစ်ဦးသည် စခန်းတွင် အလုပ်လုပ်ချိန် နာကျင်သဖြင့် အကျဉ်းထောင် ဆေးရုံတွင် ကုသလိုကြောင်း သတင်းပို့သဖြင့် လိုအပ်သလို ဆောင်ရွက်ပေးသင့်ပါသည်။

( စ )   လေဖြန်းရောဂါ ဖြစ်နေသည့် အကျဉ်းသား တစ်ဦးကို အကျဉ်းထောင်သို့ ပို့ဆောင်၍ ပြန်လည် ကုသရေးဆောင်ရွက်ပေးသင့် ပါသည်။

                                                       မြန်မာနိုင်ငံ အမျိုးသား လူ့အခွင့်အရေး ကော်မရှင်

ရက်စွဲ၊ ၂၀၁၈ ခုနှစ်၊ စက်တင်ဘာလ   ၁၁   ရက်